| 1. دلکش و دلچسپ اور مشکل طلب |
| تیرے جیسی ہو بہو ہے زندگی |
| 2. حسن کے دستِ حنائی کا ہے رنگ |
| عشق کی رگ کا لہو ہے زندگی |
| 3. ہے دھڑکتے دل کی ہی دلکش صدا |
| نامکمل آرزو ہے زندگی |
| 4. زندگی کی مختلف تعبیریں ہیں |
| اور میں کہتا ہوں تو ہے زندگی |
| 5. مردہ دل کے روبرو بس موت ہے |
| زندہ دل میں کو بکو ہے زندگی |
| 6. تجھ کو میں نے زندگی میں رکھ دیا |
| اور مانا خوب رو ہے زندگی |
| 7. ایک صورت جب تلک ہے کس لیے |
| بے کس و بے آبرو ہے زندگی |
| 8. تو گلِ رعنا ہے دل کے باغ کا |
| اس لیے تو رنگ و بو ہے زندگی |
| 9. تیرے چشم و لب ابھی لبریز ہیں |
| تو چھلکتا سا سبو ہے زندگی |
| 10. شامیانہ زلفوں اور پلکوں کا ہے |
| ورنہ کتنی گرم لو ہے زندگی |
| 11. اس سے ملوانا ترا لطف و کرم |
| ورنہ تجھ پر آخ تھو ہے زندگی |
| 12. اپنی نظروں میں ہی مرتا ہے تو خیر |
| دیکھ ورنہ چار سو ہے زندگی |
| 13. اک نمائش کا تماشا ہے جہاں |
| تیری آنکھوں کی نمو ہے زندگی |
| 14. عشق کی بازی میں کیا فتح و شکست |
| تو لہذا سرخرو ہے زندگی |
| 15. خود سے وابستہ رکھا سود و زیاں |
| آپ اپنی جنگجو ہے زندگی |
| 16. ظاہراً مدمقابل میں ہے اور |
| ورنہ کس سے دوبدو ہے زندگی |
معلومات