| دیکھے ہے سماں دیدۂ خوننابہ فشاں اور |
| کیوں کر نہ بھڑک اٹھے گا پھر عزمِ جواں اور |
| ایمان فروشوں کو یہ لگتا ہے زیاں، خیر! |
| اس راہ میں ورنہ تو ہے سود اور، زیاں اور |
| ہے مرحلۂ دار و رسن کیا مجھے درپیش |
| کیا میرے لیے رکھا گیا سنگِ گراں اور؟ |
| یہ لب کسی تالے سے بھی بند ہو نہیں سکتے |
| روکا گیا مجھ کو تو کھلے گی یہ زباں اور |
| آزاد حرم ہے تو مجھے غم نہیں کوئی |
| آباد کیا جائے گا اے دوست جہاں اور |
| سو بار مجھے مار کے زندہ کیا جائے |
| اللّٰہ عطا کر دے مجھے اب دل و جاں اور |
| ہاں مجھ کو بچاتی ہے کوئی تیسری طاقت |
| اس کو کہاں معلوم؟ ہے چشمِ نگراں اور |
| اس جنگ کے شہیدوں کا ٹھکانہ ہے الگ ہی |
| اس راہ کے راہی کا زماں اور مکاں اور |
| ایمان کے عرفان سے دل میرا جری ہے |
| پیشانی پہ میری تجھے دکھتا ہے نشاں اور |
| ہر طرح کی قوت اسے حاصل ہے مگر حیف |
| جاری ہے وہاں سلسلۂ آہ و فغاں اور |
| 'الفاظ و معانی میں تفاوت نہیں لیکن |
| ملا کی اذاں اور مجاہد کی اذاں اور' |
معلومات