| پھیکے پڑ جائیں نظارے ہم کو کیا |
| آسماں ہوں بے ستارے ہم کو کیا |
| ہم تماشائی تماشا دیکھ لیں |
| کوئی جیتے کوئی ہارے ہم کو کیا |
| قافلہ لٹنے کا غم ہم کو نہیں |
| رہنما ہیں آپ سارے ہم کو کیا؟ |
| جب کسی بھی طور ہو پائے نہ ایک |
| اب کسی کے سنگ گزارے ہم کو کیا |
| منزلِ مقصود جب ہے ہی نہیں |
| راستہ جس کو پکارے ہم کو کیا |
| سب سہاروں نے اگر چھوڑا بھی ساتھ |
| ہم نہیں ہیں بے سہارے ہم کو کیا |
| ہم نے تو اب اوڑھ لی ہے بے حسی |
| پھٹ پڑیں بھی درد سارے ہم کو کیا |
معلومات