| تضمین:- |
| مُصْطَفٰی خَیْرُ الْوَرٰی ہو |
| ---------------------------------- |
| کلام:- امامِ اہلسنت اعلیٰحضرت الشاہ احمد رضا خان بریلوی قدس سرہ العزیز |
| ----------------------------------- |
| اَنبِیا کے مُقْتَدا ہو |
| خَلْق کے تُم پیشوا ہو |
| کَامِلوں کے رَہْنُمَا ہو |
| مُصْطَفٰی خَیْرُ الْوَرٰی ہو |
| سَرْوَرِ ہَر دَوسَرَا ہو |
| بس تُمہی سے ہے تعَلُّق |
| اور اسی میں ہے تَعَمُّق |
| غیر سے ہے بَس تَفَرُّق |
| اپنے اَچھَّوں کا تَصَدُّق |
| ہَم بَدوں کو بھی نِبَا ہو |
| ہر طَرَف ہی چھائے ہیں غَم |
| سَازِشِی بھی تو نَہیں کَم |
| بِن تُمہارے کَب ہے دَم خَم |
| کِس کے پِھر ہو کر رہیں ہَم |
| گَر تُمہیں ہَم کو نہ چاہو |
| بَدْ کریں عِصْیاں ہی ظاہِر |
| بَدْ رہیں نیکی سے قاصِر |
| بَدْ بنیں ہر دَم ہی فاتِر |
| بَدْ ہنسیں تُم اُن کی خاطِر |
| رات بھر روؤ کَرا ہو |
| بَدْ ہیں خواہِش کے فِدائی |
| زِندگی ایسے گنوائی |
| بس گُناہوں میں لگائی |
| بَدْ کریں ہَر دَم بُرائی |
| تُم کَہو اُن کا بھلا ہو |
| گرچہ دُشْمن چار سُو ہیں |
| تم سے ہم پُر آرزُو ہیں |
| تھام لو تو سرخ رُو ہیں |
| ہَم وُہی نا شُسْتَہ رُو ہیں |
| تُم وُہی بَحْرِ عَطا ہو |
| مَرْتبے میں پَسْت قَد ہیں |
| جُرْم میں بھی نام زَد ہیں |
| ہاں سَگِ در تا اَبَد ہیں |
| ہَم وُہی شَایانِ رَدْ ہیں |
| تُم وُہی شَانِ سَخَا ہو |
| بے ہُنَر ہیں ، نا بَلَد ہیں |
| ہر جگہ سے ہم تو رَد ہیں |
| عَاصیِٔ ربِِّ اَحَد ہیں |
| ہَم وُہی بے شَرْمُ و بَد ہیں |
| تُم وُہی کَانِ حَیا ہو |
| ہم وہی تو کَجْ اَدَا ہیں |
| اور سِیَہ رُو ، پُر خَطَا ہیں |
| تُم کُجَا اور ہَم کُجَا ہیں |
| ہَم وُہی نَنگِ جَفَا ہیں |
| تُم وُہی جانِ وَفَا ہو |
| ہَم نہیں قَابِل جَزَا کے |
| ہَم کہاں لائِق عَطَا کے |
| مُنْتَظِر پھر بھی سَخَا کے |
| ہَم وُہی قِابِل سَزَا کے |
| تُم وُہی رَحْمِ خُدا ہو |
| مُلْک بَدْلے ، شَہْر بَدْلے |
| شام بَدْلے ، سَحْر بَدْلے |
| لَہْر بَدْلے ، بَحْر بَدْلے |
| چَرْخ بَدْلے ، دَہْر بَدْلے |
| تُم بَدَلْنے سے وَرَا ہو |
| تُم جہاں بھی مَحْو آقا |
| رُخ ہماری نَحْو مَولا |
| اب نہیں ہو سَہْو شاہا |
| اب ہمیں ہو سَہْو حاشا |
| ایسی بھولوں سے جُدا ہو |
| ہر طَرَح آباد رکھا |
| ہر طَرَح سے شاد رکھا |
| کَب ہمیں ناشاد رکھا |
| عُمْر بھر تو یاد رکھا |
| وَقْت پر کیا بھولنا ہو |
| وَقْتِ پَیٔدائِش بھی بولے |
| اے خُدا ہے عَرْض تُجھ سے |
| بَخْش دے اُمَّت کَرَم سے |
| وَقْتِ پِیدائِش نہ بھولے |
| کَیْفَ یَنْسٰی کیوں قَضَا ہو |
| بات دل کی مَحْض کردوں |
| تیز دِل کی نَبْض کردوں |
| عَرْض شَاہِ اَرْض کردوں |
| یہ بھی مولٰی عَرْض کردوں |
| بھول اگر جاؤ تو کیا ہو |
| سب ہی تو تُم پر عَیَاں ہے |
| ہو وُہی جو بَارِ جاں ہے |
| رَب بھی چاہے یہ کہاں ہے |
| وہ ہو جو تُم پر گِراں ہے |
| وہ ہو جو ہرگِز نہ چاہو |
| سُن اگر انجام لیتے |
| سوچ کر دِل تھام لیتے |
| پھر کہاں آرام لیتے |
| وہ ہو جس کا نام لیتے |
| دُشْمنوں کا دِل بُرا ہو |
| ہم تو وہ کہنے سے قاصِر |
| بس خُدا ہی پھر تو ناصِر |
| رَب کرے وہ ہو نہ ظاہِر |
| وہ ہو جس کے رَدْ کی خاطِر |
| رات دِن وَقْفِ دُعا ہو |
| جَل مَریں ناشاد بندے |
| کَب رہیں دِل شاد بندے |
| پھر رہیں آباد بندے؟ |
| مَرْ مِٹیں برباد بندے |
| خانہ آباد آگ کا ہو |
| ہو بَیاں کیسے یہ مَضْمُون |
| ہو نہ جاؤں میں ہی مَطْعُون |
| راز اس میں یہ ہے مَکْنُون |
| شاد ہو اِبْلِیسِ مَلْعُون |
| غم کِسے اِس قَہْر کا ہو |
| غَم تُمہیں ہو ،کچھ کرو سَو |
| بھولنا تو اَب بھلا دو |
| ورنہ غَم جاناں تُمہیں ہو |
| تُم کو ہو وَاللّٰہ تُم کو |
| جان و دِل تُم پر فِدا ہو |
| تُم کو ہر دَم حَق ہنسائے |
| نِعْمتیں تُم پر لُٹائے |
| ناز بھی خود حَق اُٹھائے |
| تُم کو غَم سے حَق بچائے |
| غَم عَدُو کو جان گُزَا ہو |
| نُور سے ہر سّو تَشَرُّق |
| ہر خُوشی پر ہے تَفَوُّق |
| کَب یہاں غَم کا تَحَقُّق |
| تُم سے غَم کو کیا تَعَلُّق |
| بے کَسوں کے غَم زُدا ہو |
| سَب خَزَانے تُم سنبھالو |
| شَانِ رَحْمَت رَب سے پالو |
| نار سے اُمَّتْ بَچالو |
| وہ عَطَا دے ، تُم عَطَا لو |
| وہ وہی چاہے جو چاہو |
| رَب کے تو ہیں تُم سے وَعْدے |
| ہوں تمہارے روز چَرْچے |
| حَشْر میں ظاہِر ہوں رُتْبے |
| حَق دُرُودیں تُم پہ بھیجے |
| تُم مُدام اس کو سرَاہو |
| ہے خُدا تیرا اے آقا |
| اور ہمارا ہے تُو شاہا |
| بَر تُو او بارَدْ تُو بر ما |
| بَر تُو او پاشَدْ تُو بَر ما |
| تا اَبَد یہ سِلْسِلَہ ہو |
| بات اب رضوی کی سُنیے |
| اب اِسے بَرْدوں میں لِکھیے |
| اور اِسے اپنا ہی کَہیے |
| کیوں رضا مُشْکِل سے ڈَر یے |
| جب نَبی مّشْکِل کُشَا ہو |
| ---------------------------------- |
| تضمین نگار:- ابو الحسنین محمد فضلِ رسول قادری چشتی رضوی ، کراچی |
| --------------------------------- |
| 20 ربیع الاول شریف 1448 ھ / 2 ستمبر 2026 ء |
| شبِ جمعرات |
| رات 8 بج کر 48 منٹ |
معلومات