| کیسا ہے تو بت تیرے تو قاصد ہیں کروڑوں |
| حالانکہ کئی بت کا پیمبر نہیں ہوتا |
| ہے تیری عنایت کہ ہوں برباد ہی برباد |
| گر تو نہیں ہوتا تو میں بدتر نہیں ہوتا |
| جو دل سے نکل جائے ٹھکانہ نہیں اس کو |
| اس گھر کا نکالا ہوا بے گھر نہیں ہوتا |
| کیوں چشمِ فسوں گر کی محبت میں سزائیں |
| اس بت کا پجاری کبھی کافر نہیں ہوتا |
| اچھے کا برے کا مجھے کچھ ہوش نہ رہتا |
| ان شربتی آنکھوں کا جو ساغر نہیں ہوتا |
| اس جلوۂ بے تاب میں جل جاتا خوشی سے |
| یہ گیسوئے خم دار جو رخ پر نہیں ہوتا |
| اس واسطے ہر وار پہ ہوتا ہے تشکر |
| وہ میری شکایت سے ستمگر نہیں ہوتا |
| ہاں مجھ کو شہادت کی سعادت بھی نہ ملتی |
| گر تیری اداؤں کا یہ خنجر نہیں ہوتا |
| پھر تیری کماں کو کبھی ملتی نہیں شہرت |
| یہ تیر مرے دل کے جو اندر نہیں ہوتا |
| تو سینۂ گیتی پہ جو پیدا نہیں ہوتا |
| ہے اپنا عقیدہ کبھی محشر نہیں ہوتا |
| بننا ہے سکندر تجھے تو دل کو فتح کر |
| دنیا کو فتح کر کے سکندر نہیں ہوتا |
| گر تیری نظر اس پہ نہ پڑتی کبھی ساقی |
| اس سارے جہاں کا بھی یہ منظر نہیں ہوتا |
| ہوتا نہ جو ثانی کا فسانہ بتِ نازک |
| تو سب کی نظر کا کبھی محور نہیں ہوتا |
| ہوتا جو ترے دل میں کبھی طور کا جلوہ |
| ان کعبہ کلیسا کا تو چکر نہیں ہوتا |
| سورج کے بنا ہم نے کبھی دن نہیں دیکھا |
| ہاں بت نہیں ہوتے تو یہ آزر نہیں ہوتا |
معلومات