| وہ پھول سر چڑھا ہے شعلوں میں جو پلا ہے |
| کل سرخ رو وہی ہیں جو آج دار پر ہیں |
| اے بادِ بے وفائی آ کر انھیں بجھا دے |
| جتنے چراغِ حسرت دل کے مزار پر ہیں |
| یہ کالے ہونٹ میرے یوں لال ہونٹ پر ہیں |
| گویا کہ چند بھنورے میٹھے انار پر ہیں |
| فرہاد ہو کہ مجنوں پرتو تھے سب ہی میرے |
| جتنے تھے مارِ الفت وہ خاکسار پر ہیں |
| ایفائے عہد تیرا کیا حشر میں ہی ہوگا |
| وعدے ہیں سب کے پورے ہم انتظار پر ہیں |
| بیدار کر رہا ہے خوابیدہ زندگی کو |
| شبنم پہ اشک میرے شعلے شرار پر ہیں |
| اہلِ خرد نہ روکو پینے دو جامِ لب بھی |
| جو بھی ہیں ہوش باقی مے کے خمار پر ہیں |
| جامِ دہن تو ثانی بھرپور ہے زہر سے |
| بوسے مرے لبوں کے لب کے کنار پر ہیں |
| وہ دوست ہو کہ دشمن یاری ہے سب سے اپنی |
| ثانی یہ پائے وحشت گل پر نہ خار پر ہیں |
| دنیا تماش بیں تھی دنیا تماش بیں ہے |
| نمرود تخت پر ہے براہیم نار پر ہیں |
| پانی میں کیسی آتش رگِ سنگ میں کیا شعلہ |
| ان لالہ گل سے پوچھو جو آبشار پر ہیں |
معلومات