| ہے نقش دل پہ کندہ وہ یار میرے ہمدم |
| یکتا ہے جس کا ہر اک کردار میرے ہمدم |
| بامِ عروج پر ہیں اوصاف اُس کے سارے |
| دل موہ لے وہ شیریں گفتار میرے ہمدم |
| سب فیض اُس کے در سے ملتے ہیں عاشقوں کو |
| رہتا نہ کوئی بے برگ و بار میرے ہمدم |
| دنیا کی دلدلوں سے وہ سب کو ہی نکالے |
| صحراکو جو کرے ہے گلزار میرے ہمدم |
| میدان قرب کا خالی ہے چلے بھی آؤ |
| بک جاؤ اُس کے جا کر بازار میرے ہمدم |
| دل کی ترے وہ حالت کو خوب جانتا ہے |
| تو غیر سے کرے کیوں اظہار میرے ہمدم |
| لَو عشق کی ہو جائے گر ایک بار روشن |
| پھر جگمگائے سارا سنسار میرے ہمدم |
| جس دل پہ وہ تجلی اپنی دکھائے یارو |
| کُھلتے ہیں پھر عجب واں اسرار میرے ہمدم |
| لذت سے قرب کی جو ہو کوئی آشنا تو |
| اک نشے میں وہ رہتا سرشار میرے ہمدم |
| وہ دور کرتا ہے جب اِس دل سے تیرگی کو |
| ہوں سُونےسُونے آنگن گلنار میرے ہمدم |
| سب لا علاج کہتے بیمارِ عشق کو ہیں |
| درماں ہے اس کا دیدارِ یار میرے ہمدم |
| محموؔد سر جھکا کے ہی سب مقام پائیں |
| عاجز ہی پاتے ہیں اس کا پیار میرے ہمدم |
| کلام وسیم احمد محمودؔ بٹ |
معلومات