| اسے کس نگاہ سے دیکھیے، کہ ادا تو ساری بلا کی ہے |
| ابھی دل میں رونقِ وہم و ظن مری چشمِ عکس نما کی ہے |
| تو مری زبانِ غزل سے سن، جو ستم ظریفی ہے عشق کی |
| وہ ستم تھا حسن کے شوق میں، یہ کرم تلافی جفا کی ہے |
| رہا فیضِ گل سے یوں بہرہ مند جو مشامِ بلبلِ دردمند |
| ہے جو جا بجا یہاں رقصِ بو، تو یہ شوخی دستِ صبا کی ہے |
| مرے واسطے بھی نظارے ہیں، تری راہ میں بھی ستارے ہیں |
| سو چمک بھی برقِ ادا کی ہے، سو دھنک بھی جسم نما کی ہے |
| ہیں ابھی ضمیرِ صدف میں چند خزف کی جلوہ نمائیاں |
| ابھی روشنی سی نگاہ میں کسی سنگِ خواب سرا کی ہے |
| یوں شرارے پھوٹتے جاتے ہیں مری ضربِ خارا شگاف سے |
| جو بہار عزمِ جواں پہ ہے، وہ طیورِ تلخ نوا کی ہے |
| مری آہ کا مری چاہ کا کیا مقام تیری نگاہ میں |
| جو ہے کشمکش جو ہے چپقلش سو وقارِ دستِ دعا کی ہے |
| وہی میری دن کی ریاضتیں وہی میری شب کی عبادتیں! |
| مرے دل میں پھوٹتی دم بہ دم یہ شعاع غارِ حراء کی ہے |
| دلِ ریزہ ریزہ بھی دیکھ لو تنِ داغ داغ بھی دیکھ لو |
| ہے نظیر اس کی نگاہ کی یہ لکیر جس کفِ پا کی ہے |
| مجھے اب بھی اسکی ہے جستجو مجھے اب بھی اسکی ہے آرزو |
| وہ طلب جو مہر و وفا کی ہے جو ثوابِ صدق و صفا کی ہے |
| نہ ہمارا بس نہ تمہارا بس جو رہی تو اس کی ہی دسترس |
| نہ ہماری ہے نہ تمہاری ہے یہ زمین ساری خدا کی ہے |
| نہ حجاب ہے نہ نقاب ہے ، ہے اگر تو جوشِ شباب ہے |
| کہ قبائے گل پہ ابھی تلک وہ گرفت دستِ صبا کی ہے |
| نہ مشامِ جاں میں کوئی سکوں ہے اگر تو ہے وہ ترا فسوں |
| جو مہک ہے بادِ سموم کی جو ہوا ہے دشتِ بلا کی ہے |
معلومات