| زندگی اب خود سے بھی بیزار کر دے گی مجھے |
| میری ہی راہوں کی پھر دیوار کر دے گی مجھے |
| جس قدر دل میں عبادت کی بڑھی ہے روشنی |
| پھر یہ نیکی ہی کہیں بدکار کر دے گی مجھے |
| ہے وہی آشفتگی سجدے کے قابل ہم نشیں |
| عشق کے مقتل میں جو تلوار کر دے گی مجھے |
| مشکلوں کے جس بھنور میں بھی ابھی دل ہو مگر |
| دیکھنا موجِ بلا ہی پار کر دے گی مجھے |
| ہاں ترے دیدار کا موقع تری آمد کا پل |
| کیا خوشی ہے غم سے جو دوچار کر دے گی مجھے |
| لوگ کیوں میری محبت کی کریں تقلید پھر |
| دل لگی کی راہ اب دشوار کر دے گی مجھے |
| لوٹ کر سرمایہ میرا لے کے سب کچھ جائے گی |
| یا سپردِ طالعِ بیدار کر دے گی مجھے |
| ثانی ارریاوی |
معلومات