| استغاثہ بہ جنابِ مصطفیٰ از رضْوی پر خطا ابو الحسنین محمد فضلِ رسول رضوی، کراچی |
| مقبول دُعا کر کے منظور ثنا کر دے |
| پابندِ رضا کر کے مشغولِ وفا کردے |
| دل شوقِ زیارت سے خالی نہ رہے اک پل |
| ظُلْمَات جدا کر کے معمورِ ضیا کردے |
| اے نورِ خدا مجھ کو انوار دِکھا اپنے |
| پُر نور بنادے یہ دل طُورِ ضُحا کردے |
| سب داغ مٹا کر دل پر فیض بہا دے تو |
| دلدار مِرے یہ دل اب نورِ فَزا کر دے |
| مِعراج کرا دل کو، وہ نور دکھا دل کو |
| دل آج شہا جلووں سے غارِ حِرا کر دے |
| امید لگی ہے تجھ سے ، لاج مری رکھ لے |
| امید مِری کا اب یہ باغ ہَرا کر دے |
| غرقابِ بھنور ہوں میں اب پار لگا کر جا |
| گرداب ہٹا کر بس خطرات ہوا کردے |
| طوفان شناسا ہوں امواج تلاطُم خیز |
| امواج مری آقا مِعراج نما کر دے |
| انوار ترے شامل، تو صاف خطا کر دیں |
| اوصاف مرے بس تو انوارِ ہُدا کر دے |
| ہر لمحہ رہیں تیرے تذکار زباں پر بس |
| اک رُخ کے سوا ہر رُخ دل سے تو صَفا کردے |
| اے کاش ملے مجھ کو بس ذوقِ دروں کچھ یوں |
| ہر آن گدا دل سے سو جان فِدا کر دے |
| اوہام ہٹا میرے ، آلام مٹا میرے |
| سرکار مجھے غم سے ہر بار رِہا کردے |
| محسود رہا ہوں میں، مجبور بڑا ہوں میں |
| سب دور عَدُو ہوں مجھ سے، چُور دَغا کردے |
| وہ چال چلیں جو بھی، ناکام رہیں پھر بھی |
| ہر چال پِھرے اُن کی، ہر وار خَطا کر دے |
| یوں پار لگے کشتی، تب دیکھ جلیں اعدا |
| مایوس پھریں دشمن مضبوط بِنا کر دے |
| سب تیر مڑیں مجھ سے، جب لوگ کریں حملہ |
| محفوظ سَرا، ایسی مضبوط بَنا کر دے |
| اِدبار ہٹا دے سب، اِقبال جگا دے اب |
| دکھ درد مِٹا کر سب تو دور بَلا کر دے |
| اِفلاس مٹا میرا اَشغال چلا میرے |
| محتاج رہوں تیرا بس خاص غِنا کر دے |
| اَحباب رہیں مجھ سے دل شاد سبھی ہر دم |
| اَخلاق مرے کو تو بس آپ جِلا کر دے |
| ہے رات گنا ہوں کی جاں سوز بنی میری |
| اب رات بنے روشن، مصباح جَلا کردے |
| اَذکار ترے ہمدم دن رات بنیں میرے |
| اَفکار برے مجھ سے سب، دور جِلا کر دے |
| سب کام بنیں میرے، جب یاد کروں تجھ کو |
| اک نام تِرا ہر پل غم خوار مِرا کر دے |
| مسموم ہوا پھیلی مذموم عقیدے کی |
| محفوظ ہوا کر دے محدود فِضا کر دے |
| ہے دار مرا چھوٹا، ہے گام ترا اونچا |
| اک بار قدم رکھ دےگھر نور بَھرا کر دے |
| اک نعت تری پڑھ لوں روضے پہ ترے جا کر |
| یہ دل میں تمنَّا ہے یوں مَدْح سَرَا کردے |
| نَغْمات ثنا کے ہوں لَمْحات دُعا کے ہوں |
| لب راز کُشا پھر ہَوں، تب دور غِطا کر دے |
| سو بار کروں مِدحت، سب یار بنیں مدہوش |
| ہر بار مرے نغموں کو'' سوز مِلا '' کر دے |
| اب دیر کہاں کی ہے، اب جام پلا ساقی |
| مدہوش بنا رضْوی کو دید عطا کر دے |
| از ابو الحسنین محمد فضلِ رسول رضوی کراچی |
معلومات