| سینے میں ہے دلْ مردہ، رگوں میں ہے لہو سرد |
| اور پھر خرد و نوش پہ بھی چھائی عجب گرد |
| پہلے سے ہی تاریکی کی کھائی تو ہے درپیش |
| اور عظمت و رفعت کا بھی خورشید ہوا زرد |
| خود میں ہی مگن ہو کے ہیں سب محوِ تعیش |
| ملت کی زبوں حالی سے غافل ہیں سبھی فرد |
| یہ خود غرض و اہلِ ریاء، اہلِ نفاق ہیں |
| یہ اپنے مفادات کی خاطر ہوئے ہم درد |
| یہ خود سے ہی ہارے ہیں یہ کیا جیتیں گے بازی |
| یہ مہرہ بتاتا ہے کہ ہے پٹنے کو ہر نرد |
| قائد ہوں نہ لیڈر ہوں نہ ملت کا مسیحا |
| کہتا ہوں کہ مجھ کو بھی ہے ملت کا بڑا درد |
| ان اہلِ سیاست کی ہے بس ایک ہی منشا |
| تہذیبِ فرنگی کی رہے دل پہ ترے گرد |
| الحاد کے ہاتھوں میں جو نم خوردہ شمع ہے |
| دل سے ترے توحید کے شعلوں کو کرے سرد |
| واں سیکھتے ہو خارا شگافی کے طریقے |
| تعلیمِ خودی سے سبھی یاں مرد خدا مرد |
| پھر کیوں تجھے احکام فرنگی ہیں پیارے |
| فرمانِ خدا سنتے ہی چہرہ ہے ترا زرد |
| بت خانۂ مغرب کا اگر توڑ دے پندار |
| تو مہرۂ عالم میں بھی مارے گا ہر اک نرد |
| کٹ جائیں گے مٹ جائیں گے گل سڑ کے تہِ خاک |
| احکامِ الٰہی پہ نہ آئے گی کبھی گرد |
| یورپ کی غلامی میں جو کھوتی ہے تری عمر |
| ثانی دلِ بے تاب میں اٹھتا ہے بڑا درد |
| مشرق کی مساجد میں ہیں تقلید کے اصنام |
| شعلۂ الہی ہوا شبنم کی طرح سرد |
| آؤ کہ سنواریں ہمیں اسلام کی تقدیر |
| ملت کے مقدر کا ستارہ ہیں سبھی فرد |
| ہے بوئے گل و رنگ چمن خود سے ہی بیزار |
| بلبل کیا سنے گی بھلا یہ شورِ انا الورد |
| کیسے ہو علاج تیرا پریشاں ہے معالج |
| تریاق بے تاثیر ہے بے فیض ہے نشکرد |
| اشکوں سے ہر اک شعر کو لبریز کیا ہے |
| کس منہ سے یہ دنیا مجھے کہہ دیتی ہے بے درد |
| اے بندۂ مومن تو بشیری تو نذیری |
| صد حیف کہ افرنگ زخود بے خبرت کرد |
معلومات