| قطرہ قطرہ لہو ٹپکتا ہے |
| تب ستارہ کہیں دمکتا ہے |
| آرزو دم دبائے بیٹھی ہے |
| خواب شعلہ لیے لپکتا ہے |
| آنکھ میں اس قدر سکت ہی نہیں |
| دل اُسے جیسے دیکھ سکتا ہے |
| وقت کی بندشوں سے ہے آزاد |
| وہ کوئی دم پلک جھپکتا ہے |
| اُس کی جھولی میں جب سے ہیں ہم لوگ |
| دامنِ زندگی مہکتا ہے |
| مسکراتا ہے اُس کے روبرو دل |
| اور تنہائی میں بلکتا ہے |
| کتنی بے نور ہو گئی تھی زمیں |
| آسماں روشنی چھڑکتا ہے |
| دل نے امید باندھ لی لیکن |
| رخ سے پردہ کہاں سرکتا ہے |
| ثانی ہنس ہنس کے پڑھ رہے ہیں غزل |
| لفظ در لفظ غم جھلکتا ہے |
معلومات