| ہے آج گلستان میں عنوانِ سخن پھول |
| ہر پھول فدا جس پہ وہ ہے جانِ چمن پھول |
| قدرت نے بنایا ہے جسے رشکِ عدن پھول |
| سر تا بقدم ہے تنِ سلطانِ زمن پھول |
| لب پھول دہن پھول ذقن پھول بدن پھول |
| ہو عرصہِ محشر میں تری دید سے تن پھول |
| میزان پہ اعمال بنیں سب مِنَ و عَن پھول |
| سب درد پرے ہوں بنے ہر داغِ من پھول |
| صدقے میں ترے باغ تو کیا لائے ہیں بن پھول |
| اس غنچہ ءِ دل کو بھی تو ایما ہو کہ بن پھول |
| دل ہے پَھٹا اور یہ کسی سے نہیں سِلتا |
| سکھ چین لُٹا ہے جو کہیں پر نہیں مِلتا |
| اک پھول خوشی کا بھی یہاں تو نہیں کھِلتا |
| تِنکا بھی ہمارے تو ہلائے نہیں ہلتا |
| تم چاہو تو ہو جائے ابھی کوہِ مِحَن پھول |
| شہروں میں نرالا مرے گل کا ہے مدینہ |
| اس شہر میں ہی رَحمتِ رب کا ہے زینہ |
| بٹتا ہے یہاں نعمتوں کا روز خزینہ |
| واللہ جو مل جاے مرے گل کا پسینہ |
| مانگے نہ کبھی عطر نہ پھر چاہے دلہن پھول |
| دنیا میں تو ہر چیز میں ہے عیبِ کثافت |
| ملتا ہی نہیں تجھ سا کہیں عینِ نزاہت |
| تو کیسے کہوں میں کہ ہے اُس شی میں شباہت |
| دل بستہ و خوں گشتہ نہ خوشبو نہ لطافت |
| کیوں غنچہ کہوں ہے مرے آقا کا دہن پھول |
| ہر عضو یوں جگ مگ کرے جیسے ہو رخِ صُبْح |
| بے عیب ہے وَالّٰلہ نہ ہے نقص نہ ہی قُبْح |
| جو عیب تلاشے ، لگے اس آنکھ میں تو رُمْح |
| شب یاد تھی کن دانتوں کی شبنم کہ دمِ صُبْح |
| شوخانِ بہاری کے جڑاؤ ہیں کِرَن پھول |
| بے مثل وہ تصویر خدا نے ہے بنائی |
| تشبیہِ حقیقی کو جہاں تک نہ رسائی |
| اعجاز کی ہر عضو میں یوں جلوہ نمائی |
| دندان و لب و زلف و رُخِ شہ کے فدائی |
| ہیں دُرِّ عدن لعلِ یمن مشکِ ختن پھول |
| سب راز بلندی کے نِہاں ہیں قَدِ شہ میں |
| اَنگُشْت کے ثابت ہیں نشاں چَرْخ کے مہ میں |
| ہوتے ہیں ستارے بھی فدا قدموں کی رہ میں |
| بُو ہو کے نہاں ہوگئے تابِ رُخِ شہ میں |
| لو بن گئے ہیں اب تو حسینوں کے دہن پھول |
| جب محوِ سفر ہوں میں سوئے شہرِ خموشاں |
| اس وقت نگہبان ہو میرا شہِ خوباں |
| پھر میرے گناہوں کے دفاتر ہوں پنہاں |
| ہوں بار گنہ سے نہ خجل دوشِ عزیزاں |
| للہ مری نعش کر اے جان چمن پھول |
| تجھ کو اے فلک ناز ہے سورج کی ضیا کا |
| چرچا ہے بڑا تیری ، ستاروں کی فضا کا |
| آ دیکھ ذرا جلوہ مہِ ارضِ خدا کا |
| دل اپنا بھی شیدائی ہے اس ناخن پا کا |
| اتنا بھی مہِ نو پہ نہ اے چرخ کہن پھول |
| سب درد فنا کر دے غمِ عارضِ شہ میں |
| ہر چیز بھلا ، جی لے غمِ عارضِ شہ میں |
| سب نقش مٹا دل سے غمِ عارضِ شہ میں |
| دل کھول کے خوں رولے غمِ عارض شہ میں |
| نکلے تو کہیں حسرت خوں نا بہ شدن پھول |
| ہے گُل میں اثر دَرْدِ مدینہ کا جو ہے آج |
| کیا ساتھ مِلا فَرْدِ مدینہ کا جو ہے آج |
| کیا رنگ چڑھا وَرْدِ مدینہ کا جو ہے آج |
| کیا غازہ مَلا گَردِ مدینہ کا جو ہے آج |
| نکھرے ہوئے جوبن میں قیامت کی پھبن پھول |
| میدانِ قیامت میں مصیبت ہے جاں پر |
| حامی ہمیں کوئی نہیں ملتا ہے وہاں پر |
| اس پیاس میں پانی کے لیے جائیں کہاں پر |
| گرمی یہ قیامت ہے کہ کانٹے ہیں زباں پر |
| بلبل کو بھی اے ساقی صہبا و لبن پھول |
| ہے کون جو میرے گنہ کا بوجھ اٹھائے |
| فکروں کے بھنور سے جو مجھے پار لگائے |
| بس آس ہے تیری کہ مرا کام بنائے |
| ہے کون کے گریہ کرے یا فاتحہ کو آئے |
| بیکس کے اٹھائے تری رحمت کے بھرن پھول |
| احباب چلے چھوڑ کے جب رستے کٹھن آئے |
| اے کاش ہو کوئی جو مری آس بندھا جائے |
| تنہا ہوں پریشاں یہ شبِ غم کہیں ٹل جائے |
| دل غم تجھے گھیرے ہیں خدا تجھ کو وہ چمکائے |
| سورج ترے خرمن کو بنے تیری کرن پھول |
| قرآن میں مدحت ہے افرادِ حرم کی |
| جن کی نبی سے نسبتیں ہیں پاک جنم کی |
| خیرات جہاں سے ملی رضوی کو قلم کی |
| کیا بات رضا اس چمنستانِ کرم کی |
| زہرا ہے کلی جس میں حسین اور حسن پھول |
| تضمین نگار |
| ابو الحسنین محمد فضل رسول رضوی |
| نور حمزہ اسلامک کالج ،گلشن معمار ، کراچی |
| 4 رجب المرجب 1447ھ |
| 25 دسمبر 2025ء |
| بروز جمعرات |
| بارہ بج کر سینتیس منٹ |
معلومات