| دل اٹھ کہ محوِ ناز سے کچھ گفتگو کریں |
| دل میں گھری پکار کو اب چار سو کریں |
| بت کو خدا بنا کے اسے پوجتے رہیں |
| یعنی کہ عاشقی میں ذرا پھر غلو کریں |
| یہ عشق کی نماز کبھی ہوگی پر خشوع |
| حسنِ کرشمہ ساز میں چل کر وضو کریں |
| زندہ کریں پھر حسن و محبت کے نام کو |
| چل کر کے گرم طور پہ اپنا لہو کریں |
| پھر راہِ دل فریب کی ہم خاک چھان لیں |
| پھر سوزنِ شرار سے دامن رفو کریں |
| ہوگی نہ ختم تجھ سے جو عزت ملی مجھے |
| ہر چند بدگماں مجھے بے آبرو کریں |
| اس بے پناہ حسن کو اک طورِ آتشیں |
| اس کی نگاہِ ناز کو جام و سبو کریں |
| پھر دیں گلی میں ہم اسے آواز نو بہ نو |
| پھر جراتِ پکار ہم آشفتہ ہوٗ کریں |
| لازم نہیں کہ ہم کو ملے پھر وہی جواب |
| مثلِ کلیم جلنے کی پھر آرزو کریں |
| سجدے سے آفتاب ہوا ذرۂ زمیں |
| ٹھوکر سے آسمان کو اب تو بہ تو کریں |
| مایوس کو امید کی پٹری پہ ڈال دیں |
| ہم زندہ پھر سے درسِ ولا تقنطوا کریں |
| کھوئیں متاعِ ہستی کو جو اس نے دی ہمیں |
| اور کھوئی سی متاع کی پھر جستجو کریں |
| اس بارگہ میں ضعف کی طاقت رہی زبیر |
| اب عذرِ ضعف رکھتے ہی سجدہ سہو کریں |
معلومات