| دل کی لگی تو آج قیامت اٹھائے گی |
| کیا عاشقی کی بندِ قبا ٹوٹ جائے گی |
| طوفان لائے گا کوئی پھر تیرا التفات |
| یا بے رخی چراغِ تمنا بجھائے گی |
| اس گل کے بعد آئیں بھی گل ہائے رعنا تو |
| لگتا نہیں بہارِ چمن لوٹ آئے گی |
| اندھیرے دل میں آگ سی اٹھتی ہے دم بہ دم |
| قندیلِ اشک آنکھوں میں پھر جھلملائے گی |
| بے اختیار کیفیتِ بے خودی میں بھی |
| پروانے سے بھی شمع کیا دامن بچائے گی |
| تمثالِ حسن آج فسوں گر ہے اس طرح |
| بے چہرگی کو تیری کشش کھینچ لائے گی |
| پھر عندلیبِ خوش نوا کیا گنگنائے گی |
| گل ہائے آرزو کے جنازے اٹھائے گی |
| اس دورِ بے خلوص میں سب ہیں غرض پرست |
| راہِ وفا کہیں نہ کہیں چھوٹ جائے گی |
| ہیں کم نظر سخن کے حوالے سے ہم صفیر |
| ہر شے سے پردہ میری غزل ہی اٹھائے گی |
| کرنے لگے جو زندگی خود سے ہی خود کشی |
| پھر موت اپنے آپ بہت دندنائے گی |
معلومات