| منزل پہ پہلے موت کا سامان کر دیا |
| پھر اس نے میرا راستہ آسان کر دیا |
| یہ بھی ہے ایک سانحہ کل اک عزیز نے |
| اپنے مفاد پر مجھے قربان کر دیا |
| میرے سخن میں گریہ و ہجر و زوال ہے |
| تم نے تو مجھ کو میرؔ کا دیوان کر دیا |
| ہوش و حواس و عقل و خِرَد کو شکست دی |
| تیری نگاہِ ناز نے بے جان کر دیا |
| اے یار کہہ بھی دو کہ بہت سوچتے ہو تم |
| ہم نے تو اپنے عشق کا اعلان کر دیا |
| ہم نے تو اپنے زخم تھے لکھ کر رکھے فقط |
| یاروں نے اس کا دیکھیے دیوان کر دیا |
| یہ ہے مآلِ صحبتِ زاہد جنابِ دل |
| حیواں سے اک نگاہ نے انسان کر دیا |
| سوز و الم پہ آپ کو درکار تھی غزل |
| وہ کام ہم نے آپ کا حسانؔ کر دیا |
معلومات