| کس طرح تحریر ہو کیسے سناؤں داستاں |
| رہ رہے تھے شہر میں کوئی کہیں بیوی میاں |
| ایک بیٹے سے بھی خالق نے نوازا تھا انہیں |
| خوبصورت زندگی تھی روز و شب کے درمیاں |
| ایک دن کے حادثے نے گھر کو اوندھا کر دیا |
| مَوت نے آ کر اچانک چھین لی بیٹے کی ماں |
| کچھ دنوں کے بعد آخر باپ کو آیا خیال |
| مجھکو بیوی چاہئے بیٹے کو بھی درکار ماں |
| آخر اک دن اک نویلی صنفِ نازک آ گئی |
| زندگانی کی ڈگر پر پھر چلا یہ کارواں |
| ایک دن ابُّو نے پوچھا کچھ کہو لختِ جگر |
| پہلی ماں اچھیّ تھی یا کہ دوسری اچھّی ہے ماں |
| پہلی ماں جھُوٹی تھی یہ سچ بولتی ہے ایک دم |
| بس یہی اک فرق ہے جو مَیں نے پایا درمیاں |
| سُن کے یہ بیٹے کے مونہہ سے باپ حیراں رہ گیا |
| کس طرح بیٹا بتاؤ بالمفصل داستاں |
| پہلی ماں کہتی تھی بیٹا دیکھنا غلطی نہ ہو |
| رات کا کھانا نہیں مِل پائے گا ورنہ میاں |
| پھر بھی مِل جاتا تھا کھانا مجھ کو ہر غلطی کے بعد |
| اور کچھ کہتی تھی ابُّو اور کچھ کرتی تھی ماں |
| دوسری کہتی ہے دیکھو اب اگر غلطی ہوئی |
| بھُوکا رہنا ہو گا چاہے سوُکھ جائیں قلب و جاں |
| دو دنوں سے کچھ نہیں کھایا شرارت کے سبب |
| پہلی ماں جھُوٹی تھی ابُّو اور یہ سچّی ہے ماں |
| یہ جو کرتی ہے وہی کرتی ہے آخرکار کو |
| کیونکہ یہ سچّی ہے ابّو اور وہ جھُوٹی تھی ماں |
معلومات