| خدا نے خود بشارت دی خلافت کی جو قرآں میں |
| عطا کر کے یہ نعمت تمکنت بخشی ہے ایماں میں |
| یہی ہے نور مومن روشنی پاتے ہیں اس سے جب |
| سمجھ لیتے ہیں دشمن اب یہ بھٹکیں گے بیاباں میں |
| ابوبکر و عمر عثماں علی سب کی خلافت میں |
| محمّد مصطفےٰ کے بعد طاقت تھی مسلماں میں |
| مگر وعدہ خلافت کا مسَلما نوں سے تب تک ہے |
| عمل صالح رہیں پختہ رہیں وہ اپنے ایماں میں |
| نبوّت مل گئی پھر سے خدا کا فضل ہے بے شک |
| خلافت اس کے بعد آنے کا وعدہ بھی تھا فرقاں میں |
| مسیحا الوصیّت میں خبر جو دے گیا آخر |
| ہوئی ظاہر وہ قدرت ثانیہ اک مردِ میداں میں |
| زُمامِ کارواں ہاتھوں میں آئی نورِ دیں کے پھر |
| خلافت کو سمجھتا تھا وہ لازم جزوِ ایماں میں |
| وہ با ہمّت عجب نورِ یقیں سے خود منوّر تھا |
| طبیب اعلٰی مگر دل اس کا لگتا علمِ قرآں میں |
| پھر آگے لے گیا محمود تیزی سے جماعت کو |
| صدی آدھی سے زائد وہ چلا ہر ایک طوفاں میں |
| بڑی مضبوط بنیادوں پہ قائم کیں جو تنظیمیں |
| جہاں میں ہر طرف پھیلا دیا پیغامِ قرآں کو |
| کیے پھر پیش ناصر نے حکومت کو جواب اپنے |
| حکومت نے بلایا جب انہیں تھا اپنے ایواں میں |
| دیا تھا اس نے نعرہ ہر کسی سے پیار کرنے کا |
| مٹائی مسکرا کر اس نے نفرت نوعِ انساں میں |
| زمام آئی خلافت کی ہے جب طاہر کے ہاتھوں میں |
| تو دیکھا عزم پھونکی روح اس نے نو جواناں میں |
| وہ ہجرت کرکے آیا ملک سے اپنے مگر آ کر |
| چلا لے کر جماعت کو ترقی کے خیاباں میں |
| حکومت وہ دلوں پر کر کے رخصت ہو گیا جلدی |
| مگر زندہ رکھے گا ام ٹی اے اس کو گلستاں میں |
| ہمیں مسرور نے بخشی خوشی جب غم کے مارے تھے |
| بنا مرہم وہ زخموں کا جو تھے شامِ غریباں میں |
| ہمارا راہبر ہم سب کا پیارا وہ خلیفہ ہے |
| مٹا کر غم ہمارے ڈٹ گیا ہے پھر سے میداں میں |
| دیا پیغام امن و آشتی کا اس نے دنیا میں |
| دعاؤں میں ہے ان کو یاد رکھا جو ہیں زنداں میں |
| خلافت ہر قدم پر عروة الوثقیٰ ہماری ہے |
| اسی کو تھام کر بیٹھے ہوئے ہیں اس کے داماں میں |
| خدایا ہم خلافت سے رہیں وابستہ مرنے تک |
| نہ اس کا ہاتھ چھوڑیں ہم چلیں راہِ شہیداں میں |
معلومات