| زخم دل کا جو دکھایا تو فقط تیرے حضور |
| اشک کو رشک بنایا تو فقط تیرے حضور |
| دل میں پوشیدہ کئی بت بھی رہے ہوں گے کبھی |
| خود کو سجدے میں گرایا تو فقط تیرے حضور |
| غیر کو ہم نے بتایا نہ کبھی درد اپنا |
| دل نے گر شور مچایا تو فقط تیرے حضور |
| جب ندامت سے کبھی آنکھ میں آئے آنسو |
| ان کو جی بھر کے بہایا تو فقط تیرے حضور |
| بےقراری میں بنا تیرے گزارے دن رات |
| دل نے جو چین بھی پایا تو فقط تیرے حضور |
| ہم کو دنیا کے سبھی رشتوں نے باندھے رکھا |
| تھا جو اپنا بھی پرایا تو فقط تیرے حضور |
| دھوپ کی ایسی تمازت تھی کہ جل جاتے ہم |
| مل گیا ہم کو جو سایہ تو فقط تیرے حضور |
| دیکھ کر دامنِ تر شور مچایا سب نے |
| ہم نے دامن کو چھپایا تو فقط تیرے حضور |
| عاشقوں کی کبھی فہرست بنی تو اس میں |
| نام طارق کا جو آیا تو فقط تیرے حضور |
معلومات