| باقی ہے بھلے جسم مگر جان نہیں ہے |
| یہ زندہ و جاوید کی پہچان نہیں ہے |
| جو دل کہ شناسائے غم و رنج نہیں ہے |
| وہ سنگ مگر ہے دلِ انسان نہیں ہے |
| سوچو تو ذرا قوم کے غیور جیالو |
| کیا ہے کہ خدا کے یہاں کچھ مان نہیں ہے |
| ہو دست و گریباں کیوں اے ملت کے محافظ ! |
| یہ دینِ ھدی جنگ کا میدان نہیں ہے |
| سوچا بھی کبھی تو نے ہے اے مردِ جہاں گیر ! |
| کیوں ہند میں تیرا کوئی سلطان نہیں ہے |
| کیوں بانٹے ہوئے تجھ کو ہے صوبائی تعصب |
| کیا تجھ میں ذرا غیرتِ ایمان نہیں ہے |
| آسامی و بنگالی و پردیشی ، بہاری |
| یہ ہندی مسلمانوں کی پہچان نہیں ہے |
| ہے پیشِ نظر خوشہ و سنبل کا تحفظ |
| خرمن کو جلاۓ جو وہ دہقان نہیں ہے |
| جب تک نہ ہو رگ رگ میں ترے روحِ محمد ﷺ |
| رکھنے سے " علی" نام مسلمان نہیں ہے |
| اس دورِ ستمگر میں کوئی حاملِ قرآں |
| مومن نہیں جو رہروِ زندان نہیں ہے |
| ملت کی محبت پہ نچھاور جو کرے نا |
| ہر چیز کہ وہ صاحبِ ایمان نہیں ہے |
| ۔میدانِ عمل سے نہ تو کترانا جا اے دل ! |
| یہ بندۂ مومن کی کبھی شان نہیں ہے |
| کلیوں سے کبھی گلشنِ ویراں نہ سجے گا |
| جب غنچۂ ہستی میں ہی ارمان نہیں ہے |
| اس شاعرِ نو بر کا مخاطب ہے خرد مند |
| محکوم صفت، بزدل و نادان نہیں ہے |
| میدانِ عمل کا ہے کوئی تیغِ جفاکش |
| مجنوۓ ستم زارِ بیابان نہیں ہے |
| اے ملت مرحوم کے ہمدرد و بہی خواہ |
| ملت کے تحفظ کا کیوں سامان نہیں ہے |
| اے سنجر و طغرل کے عزائم کے نگہباں |
| تیری صفوں میں کیوں کوئی عثمان نہیں ہے |
| ہے دل کو ترے شوخ حسینوں کی تمنا |
| ملت پہ مگر دل ترا قربان نہیں ہے |
| یوں تو تری ہستی بھی ہے بے باک و لیکن |
| افسوس کہ تو خالد و سلمان نہیں ہے |
| اڑتے ہی رہو گے خس و خاشاک کی مانند |
| جب تک کہ تو بھی پیکرِ طوفان نہیں ہے |
| ملتی ہے سیاست کو ترے دم سے ہی زینت |
| اور تو ہے کہ اف رونقِ ایوان نہیں ہے |
| حق بات یہی ہے کہ ہے میراثی ترا دیں |
| جو قوم میں کوئی بھی نگہبان نہیں ہے |
| ہو حکمت و دانائی فراست سے تہی دست |
| تجھ میں کہ ذرا حکمتِ لقمان نہیں ہے |
| شاہؔی تو اگر قوم کو یکجا نہ کیا تو |
| سمجھوں گا تو بھی قوم کا نگران نہیں ہے |
معلومات