کیا حقیقت ہے کیا فسانہ ہے |
ایک دن سامنے تو آنا ہے |
قدریں بدلی ہیں وقت کا ہے اثر |
یا ترقی کا شاخسانہ ہے |
اب رسائی ہے علم تک سب کی |
ہاتھ میں علم کا خزانہ ہے |
پھر بھی جاہل ہیں رہنما اکثر |
مال و دولت انہیں بنانا ہے |
اب نہیں دور بیں نظر ان کی |
فکر ہے جلد ان کو جانا ہے |
قوم کی فکر ہو بھلا کیونکر |
نام دنیا میں بس کمانا ہے |
کون پوچھے کہاں سے مال آیا |
گھر نیا ہے یا پھر پرانا ہے |
کتنے وعدے کئے جو پورے ہوئے |
کس نے اب کس کو آزمانا ہے |
آدمی کا ہے انحطاط ہوا |
یا کہ بدلا ہوا زمانہ ہے |
آگے دیکھیں کھلے گا کیا منظر |
وقت آگے ہوا روانہ ہے |
معلومات