| کس نے پھر موسمِ بہار دیا |
| جب خزاں آئی ، بار بار دیا |
| پھول کلیوں کو یوں نکھار دیا |
| بھر کے رنگ ان کا اشتہار دیا |
| وہ حسیں ہو گا کس قدر جس نے |
| حسن سب کو ہی مستعار دیا |
| دینے والا ہے ہر کسی کو وہ |
| جب دیا اس نے بے شمار دیا |
| جس نے مانا ہے اس کو خود اس نے |
| ذات پر اپنی اعتبار دیا |
| دل جو دھڑکا ہے اس کی خاطر تو |
| اس نے اس دل کو ہی قرار دیا |
| خود وہ تسکینِ جاں بنا اس کا |
| جان کو اس پہ جس نے وار دیا |
| اس نے ابلیس کو کیا آزاد |
| کب فرشتوں کو اختیار دیا |
| اور انساں بنا دیا مجھ کو |
| اس قدر اس نے اپنا پیار دیا |
| طارق اتنا ہے وہ عزیز از جاں |
| ہم نے دل اس پہ اپنا ہار دیا |
معلومات