| روح کی تشنگی مے خانے میں لے آئی ہے |
| کیوں ترے در پر یہ انجانے میں لے آئی ہے |
| جب چلی یاد تری ساتھ تو ایسا نہ لگا |
| وہ محلّے کسی بیگانے میں لے آئی ہے |
| روشنی ڈھونڈنے نکلا جو میں دل کے اندر |
| یوں لگا تیرگی تہہ خانے میں لے آئی ہے |
| جب ترے وصل کی امّید مرے ساتھ چلی |
| دل اٹھا کر مرا نذ رانے میں لے آئی ہے |
| داستاں میری سنی تُو نے جو ہمدردی سے |
| گفتگو درد کو افسانے میں لے آئی ہے |
| تُو نے دیکھا جو مجھے ایسے لگا تیری نظر |
| نشّہ بھر کر کسی پیمانے میں لے آئی ہے |
| کوئی نسبت تو رہی ہو گی کہیں مجنوں سے |
| کیوں یہ قسمت مجھے ویرانے میں لے آئی ہے |
| کون چھوڑے گا کبھی ایسی محبّت طارق |
| ایسی تبدیلی جو دیوانے میں لے آئی ہے |
معلومات