| آپ آئیں گے اگر دل میں تو راحت ہو گی |
| اس سے کیا اور بڑی پھر کوئی جنَّت ہوگی |
| لفظ محتاج اگر ہوں بھی زباں دانی کے |
| وہ سمجھ لے گا اشارے ، جو محبّت ہو گی |
| وہ مجھے خود سے جُدا کر کے تو پچھتائے گا |
| اُس کو بھی میری طرح اپنی ضرورت ہو گی |
| میں نے یہ سوچ کے جذبات پہ قابو رکھا |
| ایک آنسو بھی گرا گر تو ندامت ہو گی |
| ہم تو مل جل کے کبھی روتے کبھی ہنستے تھے |
| ہم پہ رونے کی کسے دنیا میں فرصت ہو گی |
| پوچھنے آتے رہے لوگ تو بیماری میں |
| ہاں مگر اس کے بنا کیسے عیادت ہو گی |
| کبھی بن جا تا ہے مجبوری یہ چپ رہنا بھی |
| کھول دی ہم نے زباں گر تو شکایت ہو گی |
| حشر کے روز بھلا کون کہے گا مجھ سے |
| تم کو معلوم تھا طارق کہ قیامت ہو گی |
معلومات