| ہمیشہ سے مرے دل میں کوئی آباد رہتا ہے |
| جو سچ اور جھوٹ کی پہچان میں آزاد رہتا ہے |
| میں چپ رہ کر سنا کرتا ہوں پھر پڑتا ہوں سوچوں میں |
| عمل اس کے کہے پر گر کروں وہ شاد رہتا ہے |
| تمہیں کیسے سُنائیں حال اپنی بے خودی کا ہم |
| اسیرِ زلفِ جاناں ہو جو کب آزاد رہتا ہے |
| بھلے دن تھے کہ مل جاتے تھے کوئی آشنا چہرے |
| مگر اب گاؤں میں کوئی کہاں آباد رہتا ہے |
| چمن کو گلفروشوں نے کیا خالی گلابوں سے |
| وہاں بلبل کوئی کرتا ہوا فریاد رہتا ہے |
| پرندے اڑ گئے اپنے گھروں کو شام سے پہلے |
| قفس تھامے مگر اب بھی وہاں صیّاد رہتا ہے |
| مجھے تو پھونک کر رکھنا قدم ہے جس طرف جاؤں |
| یہاں ہر موڑ پر میرا کوئی نقّاد رہتا ہے |
| انا الحق کی صدا ئیں اب بھی اٹھتی ہیں نشیمن میں |
| اگرچہ ہر گلی میں اب کوئی جلاّد رہتا ہے |
| مجھے تو صبر کرنا ہے مجھےحق بات کہنی ہے |
| مرے مدِّ نظر ہر دم مِرا اُستاد رہتا ہے |
| تری شہ رگ سے بھی نزدیک ہے طارق وہ ہر لمحے |
| کہ جس کے اک اشارے پر پڑا شدّاد رہتا ہے |
معلومات