| اس کو پیری میں مریدی کا خیال آیا ہے |
| ہاتھ میں کوئی نیا ، لگتا ہے جال آیا ہے |
| جس کے چُنگل سے میں نکلا تھا بڑی مشکل سے |
| پھانسنے کو مجھے پھر لے کے وہ مال آیا ہے |
| جبّہ پو شوں سے نہیں جان چھڑائی جاتی |
| تفرقہ ، دل میں اگر نفرتیں پال آیا ہے |
| مفتئ دین کو تقویٰ سے غرض کوئی نہیں |
| یہ عجب دور ہے کیا قحطِ رجال آیا ہے |
| ساری دنیا ہی مصیبت میں گرفتار ہے اب |
| بچ کے ہم جائیں کہاں ایسا وبال آیا ہے |
| جوش آتے ہوئے دیکھا ہے انہیں پہلے بھی |
| پھر سے اب باسی کڑھی میں یہ اُبال آیا ہے |
| اس کو آثارِ محبّت نظر آتے ہی نہیں |
| ایک ہی ضد ہے کہ بس حکمِ قتال آیا ہے |
| جس طرح داؤ لگے اپنی تجوری بھر لو |
| ہے کسے فکر یہ کیا مالِ حلال آیا ہے ؟ |
| طارق اس کو یہ کہو اپنی ذرا فکر کرے |
| وہ گنہ اپنے کسی اور پہ ڈال آیا ہے |
معلومات