| رنگ بھرتے ہوئے تصویر میں سوچا ہو گا |
| کون سا رنگ ترے چہرے پہ جچتا ہو گا |
| حسن جب دیکھا پسِ پردہ یہ سوچا میں نے |
| خوبصورت تو فقط رنگ حیا کا ہو گا |
| کر سکوں حسن بیاں اس کا یہ ممکن ہی نہیں |
| میں اگر سوچوں غلط فہمی یا دھوکا ہو گا |
| جس کی تخلیق پہ حیرت تھی فرشتوں کو ہوئی |
| اس نے جو رنگ بھرا ہو گا وہ اچھا ہو گا |
| جس کے سائے نے بچایا ہے کڑی دھوپوں سے |
| اس کے آنگن میں محبّت ہی کا پودا ہوگا |
| جس نے چکھا ہے کبھی عشقِ حقیقی کا مزہ |
| رات کے پچھلے پہر سجدوں میں روتا ہو گا |
| کل کو جانا ہو جسے پاس نہ ہو زاد کوئی |
| چین کی نیند بھلا وہ کہاں سوتا ہو گا |
| طارق اس دور میں بھی لوگ اگر ہیں اچھے |
| ان سے راضی تو یقیناً تِرا مولا ہو گا |
معلومات