کب تک ہم کو خواب دکھایا جائے گا |
کب جنَّت کا باب دکھایا جائے گا |
آیا ہے سیلاب دکھایا جائے گا |
ہوں گے وہ غرقاب دکھایا جائے گا |
وعدوں پر کب تک بیتے گا جیون یہ |
کب پیاسوں کو آب دکھایا جائے گا |
میرے نکتہ چینوں نے پوچھا ہے کب |
اطلس اور کمخواب دکھایا جائے گا |
میں ان سے کہتا ہوں تھوڑا صبر کرو |
ہوتے ہیں اسباب دکھایا جائے گا |
جنگل میں ہیں چھوڑ گئے جو آدم کو |
ہیں کس کے احباب دکھایا جائے گا |
دوست خدا کے جو ہوتے ہیں ان کے بھی |
ہوتے ہیں آداب دکھایا جائے گا |
جن کا ظاہر باطن ایک ہے دنیا میں |
کتنے ہیں کم یاب دکھایا جائے گا |
کھیون ہار نہ ہو کشتی کا گر کوئی |
ملتے ہیں گرداب دکھایا جائے گا |
سن بیٹھے ہیں کفر کے فتوے پہلے بھی |
کون ہے اب کذّاب دکھایا جائے گا |
تاریکی تھی وقت پہ اپنے دنیا میں |
اُترا جو مہتاب دکھایا جائے گا |
کوثر کی نہریں لایا ہے کون یہاں |
کون ہوئے سیراب دکھایا جائے گا |
پھر سچا اسلام جہاں میں پھیلا ہے |
ہم بھی ہیں بے تاب دکھایا جائے گا |
طارق اپنی آنکھوں سے دیکھیں گے سب |
ہوں گے ہم شاداب دکھایا جائے گا |
معلومات