| مسرور جب سے ہو گیا محبوب دوستو |
| ہم پر کرم خدا کا ہوا خوب دوستو |
| دیکھا ہے اس نے مست نگاہوں سے ایک بار |
| ہم تو اسی سے ہو گئے مضروب دوستو |
| پھرتے ہیں اس گلی میں جو دیوانہ وار ہم |
| کہتے ہیں لوگ ہو گئے مجذوب دوستو |
| جب سے ہوا ہے آ کے وہ آباد شہر میں |
| کوچے یہاں سبھی ہوئے مرغوب دوستو |
| کتنے ہی لوگ لے گئے حسرت دلوں میں یہ |
| ہم اس سے کیوں نہ ہو گئے منسوب دوستو |
| دُنیا کو اس نے پیار کا ایسا سبق دیا |
| دُشمن بھی اس سے ہو گئے مرعوب دوستو |
| ساقی لُٹائے علم اور معرفت کے جام |
| پی کر تو دیکھو ، یہ کبھی مشروب دوستو |
| ظلمت رہی ہے بر سرِ پیکار ، نور سے |
| کیوں صبحِ نو سے ہو گئے ، محجُوب دوستو |
| وہ خود ہی فیصلہ کریں ، خود ہی جرح کریں |
| کوئی ہمارا بھی تو ہو ، مندوب دوستو |
| لکھی گئی ہے فتح ہمارے نصیب میں |
| ہو کر رہے گا ، جو ہوا ، مکتوب ، دوستو |
| تم بھی بڑھا کے ہاتھ ، وہی ہاتھ تھام لو |
| گر ہے وصالِ یار ہی مطلوب ، دوستو |
| طارق سکھا دیا اسی نے گفتگو کا ڈھنگ |
| اعلیٰ سُخن کا ہو گیا اُسلوب دوستو |
معلومات