| اب امانت میں خیانت نہیں کی جا سکتی |
| ہو فراست تو حماقت نہیں کی جا سکتی |
| مجھ کو بھیجا ہے یہاں کوئی تو مقصد ہو گا |
| زندگی یوں تو ودیعت نہیں کی جا سکتی |
| ہر کوئی اپنے عمل کا ہے اگر ذمہّ دار |
| بن تعلّق تو شفاعت نہیں کی جا سکتی |
| دیکھ کر بوجھ یہ ڈالا گیا اُن کندھوں پر |
| ورنہ یونہی تو رسالت نہیں کی جا سکتی |
| کچھ ہمیں بھی تو وہ تیّاری کا موقع دے گا |
| یوں اچانک تو قیامت نہیں کی جا سکتی |
| نفع ہو گا یا زیاں کس نے یہ سوچا ہے ابھی |
| اس محبّت میں تجارت نہیں کی جا سکتی |
| پیش کرنے کو اگر کچھ بھی مرے پاس نہیں |
| پھر ندامت میں زیارت نہیں کی جا سکتی |
| جو محبّت کی علامت کے لئے رکھی ہو |
| اُس عبادت میں رعایت نہیں کی جا سکتی |
| ہے محبّت کی تپش گرمئِ جذبات کے ساتھ |
| اس تمازت میں ریاضت نہیں کی جا سکتی |
| کون آئے گا وکالت کی اجازت لے کر |
| واں صداقت کی شکایت نہیں کی جا سکتی |
| طارق اب اپنی ارادت میں جسارت نہ کرو |
| نظر انداز عدالت نہیں کی جا سکتی |
معلومات