| در جوانی ہو خزاں میں بھی بہارِ زندگی |
| وقتِ پیری سبزہ و گل ، خارزارِ زندگی |
| دل کو راحت دیں حسیں نظّارے گرد و پیش کے |
| ہوں اگر حاصل ہمیں شیریں ثمارِ زندگی |
| اشک گرتے ہوں ندامت کے اگر وقتِ سحر |
| خود بخود دُھل جائے سب گرد و غبارِ زندگی |
| کیا سُہانے دن تھے جب تھی باغ میں مَوجِ بہار |
| خشک ہو کر اب تو گلشن بھی ہے بارِ زندگی |
| بے قراری کا سبب ہے بھولنا تُجھ کو کہ دل |
| یاد میں تیری ہی پاتا ہے قرارِ زندگی |
| مےکدے میں جام پیتے ہیں تمہارے ہاتھ سے |
| تا سرایت ہو رگ و جاں میں خُمارِ زندگی |
| آئینہ شفاف طارق ہے بنا سارا جہاں |
| کوئی دیکھے تو سہی نقش و نگارِ زندگی |
معلومات