| حسن کو دیکھ کے جب عشقِ بتاں بولتا تھا |
| کوئی چپکے سے مرے دل میں نہاں بولتا تھا |
| جب یقیں مجھ کو نہیں تھا تو گماں بولتا تھا |
| کیا تھا مقصد مرے آنے کا یہاں بولتا تھا |
| آئنہ پھینک دیا توڑ کے باہر میں نے |
| سچ مرے سامنے کر کے وہ عیاں بولتا تھا |
| دیکھ کر اپنی ہی تصویر کو حیران تھا میں |
| میرا ہر نقش مصوّر کی زباں بولتا تھا |
| قائلِ حسن فقط میں ہی نہ تھا دنیا میں |
| مبتلا عشق میں ہرپیر و جواں بولتا تھا |
| وہ مرے سامنے آیا تو میں کچھ کہہ نہ سکا |
| یوں تو ہر ایک کے آگے میں رواں بولتا تھا |
| چاند سورج بھی ہوئے ماند تھے اس کی خاطر |
| آسماں اس کے لئے بن کے نشاں بولتا تھا |
| تہلکہ نوکِ قلم سے تھا مچایا اس نے |
| اس کی باتوں میں سحر تھا وہ جہاں بولتا تھا |
| دیکھ کر حُسنِ بیاں ، حسن کا قائل جو ہوا |
| وہ فقط سنتا تھا اس کی، وہ کہاں بولتا تھا |
| ہم بھی گھائل ہوئے طارق ہیں ان ہی نظروں کے |
| جن کی تعریف میں یہ کون و مکاں بولتا تھا |
معلومات