| کہتے ہو ، چاہتے تھے جو ، کرنے نہیں دیا |
| خود کو تمہارے ہاتھ سے مرنے نہیں دیا |
| تم آگ کے کنارے پہنچ کر بھی بچ گئے |
| یوں چاہتوں نے تم کو بکھرنے نہیں دیا |
| دیکھا تو ہو گا آئنہ تم نے بھی بارہا |
| تاریکیوں نے تم کو سنورنے نہیں دیا |
| جلوہ دکھا کے اُس نے منوّر کیا جہاں |
| رُخ تم نے موڑا ، دل کو نکھرنے نہیں دیا |
| سیکھا ہے کس نے تیرنا ساحل پہ بیٹھ کے |
| پانی میں کس نے تم کو اترنے نہیں دیا |
| تھی فصلِ گل بھی آئی لئے ایک رُت نئی |
| منظر میں تم نے رنگ ہی بھرنے نہیں دیا |
| کہتے ہو چھوڑ کر ہمیں آگے نکل گئے |
| تم نے ہی اپنے گھر میں ٹھہرنے نہیں دیا |
| طارق تو آسمان کی وسعت کو پا گیا |
| تم نے قدم زمیں پہ جو دھرنے نہیں دیا |
معلومات