| نیرنگئی خیال پہ لفظوں کا پیرہن |
| فکرِ رسا کی اُپچ پہ یادوں کا بانکپن |
| وہ شوخیٔ جمال کہ اُٹھتی نہیں نظر |
| دریا کی تہہ میں جیسے کہ لہریں ہوں مَوجزن |
| موجِ خرامِ ناز کا قصّہ بیان ہو |
| راتوں کی چاندنی میں لگے چاند کو گہن |
| گھر میں دوا نہ دارو نہ روٹی اناج ہے |
| چہرے پہ پھر بھی با خدا کوئی نہیں شکن |
| بیٹھے ہیں رہ گزر پہ کہ مطلع بیاں کریں |
| دُھت ہیں نشے میں کوئی تو آئے گا بد چلن |
| مطلع کے بعد سوچ ہے بیتُ الغزل کی بھی |
| مے خانے کے ہجوم میں ساقی کا بانکپن |
| اتنے میں ایک چھوٹی سی لڑکی پکار کر |
| کہتی ہے بابا جان لُٹی گھر کی انجمن |
| گھر میں دوا نہ روٹی نہ آٹا ہے دستیاب |
| بھائی مریض امّاں بھی بے جان و خستہ تن |
| اُٹھئے اور اپنے گھر کی بھی لیجے ذرا خبر |
| کیسے چلے گر آپ نے بدلے نہ یہ چلن |
| اُٹھنے کا اب نہیں یہ نشے میں ہی مر گیا |
| دفن و کفن کو دیکھے گی رندوں کی انجمن |
معلومات