جھاڑیوں کی اوٹ میں پچھلے پہر کا آفتاب |
جیسے مفلس کا بڑھاپا جیسے بیوہ کا شباب |
دور صحرا میں کسی رہرو کو پانی کی تلاش |
رات کی ڈھلتی جوانی بدلیوں میں ماہتاب |
تنگدستی کی گھٹن سے زخم خوردہ نازنیں |
اور پھر حجرے کے اندر مستیاں کارِ ثواب |
جھونپڑی کے سامنے اوباش لڑکوں کا ہجوم |
خوبرو الھڑّ دوشیزہ آرزوؤں کا سراب |
میکدے میں شیخ صاحب کا بیانِ دلنشیں |
اور کونے میں کہیں اک اور بھی عزّت مآب |
تخلیہ بہتر ہے یا لالہ رخوں کی محفلیں |
عہدِ گم گشتہ کے سپنے جاگتی آنکھوں کے خواب |
بیچ ڈالا خرقۂ اسلاف کو بازار میں |
کیسے ممکن ہے کبھی آئے پرانا انقلاب |
ہر طرف اتنا تفاوت ہے کہ دل ہوتا ہے خوں |
کون جانے ختم کب ہوگا طبیعت کا عذاب |
اپنی اپنی کوششوں کے سب مکلفّ ہیں امید |
وقت بیتا جا رہا ہے آلگا یومِ حساب |
معلومات