| کیا پوچھتے ہو حال دلِ خستہ زار کے |
| دیکھی ہے مَوت زندگی کے دن گزار کے |
| وہ نازشِ دوام کہ خِیرہ ہوئی نگاہ |
| دیکھا ہے ان کو خواب میں نذریں اتار کے |
| گر مل گئے تو پھیر لی نفرت سے چشمِ ناز |
| تدفین پر دکھاوے کو بوسے مزار کے |
| گُزری ہے زندگی ترے قول و قرار میں |
| وعدوں کی آڑ میں کئے وعدے فرار کے |
| بچّوں کی بھوک میں کبھی حاذق طبیب میں |
| بیچا ہے جسم ماں نے کئی بار ہار کے |
| جب آئی لب پہ بات تو ہمّت نہیں ہوئی |
| واں ٹھاٹھ باٹ اُن کے یاں کپڑے ادھار کے |
| قحطُ الرجال میں بھی کئی ایسے لوگ ہیں |
| دنیا خراب کر لی ہے عقبیٰ سنوار کے |
| عمرِ عزیز غفلتوں میں ڈھل گئی امید |
| بیٹھے ہوئے ہیں راہ پہ جھولی پسار کے |
معلومات