| لے گیا دل سرِ محفل تھا وہ رہزن جیسے |
| اس سے پہلے نہ ہوا اس کا تھا درشن جیسے |
| اس کی آہٹ کہیں نزدیک سنائی دی ہے |
| تیز ہوتی ہے مرے دل کی یہ دھڑکن جیسے |
| جب مجھے چلنا پڑا جلتے ہوئے رستوں پر |
| وہ دعا بن کے رہا دھوپ میں چلمن جیسے |
| زندگی یوں بھی کئی لوگ بِتا دیتے ہیں |
| بس سجا رہتا ہے الماری میں برتن جیسے |
| جب مرے دوست نے قصے وہ پرانے چھیڑے |
| یوں لگا ، لوٹ کے آیا مرا بچپن جیسے |
| وہ جو الفاظ خزانوں ہی کی صورت اترے |
| سب بنی اس کی تصاویر ہیں مخزن جیسے |
| چاند جب بھی کبھی آ کاش سے اُترا دل میں |
| دل کا اس نور سے روشن ہوا آنگن جیسے |
| جب بسا دل میں وہ اپنے ، تو لگا یوں طارق |
| ایک ویرانے میں پھولوں بھرا گلشن جیسے |
معلومات