| رمضان جب سے آ گیا اکناف و ناف میں |
| شام و سحر ہیں رونقیں شہر و مضاف میں |
| مہمان بن کے آتا ہے ماہِ صیام یہ |
| ضائع نہ ہوں یہ دن کہیں لاف و گزاف میں |
| یہ برکتوں کے دن ہیں یہ راتیں ہیں قیمتی |
| غفلت کے ہم نہ سو کے گزاریں لحاف میں |
| ہر روز ہم پڑھیں اسے ایسا نہ ہو کہیں |
| پھر طاق پر پڑا رہے قرآں غلاف میں |
| سائے گنہ کے دور ہوں توبہ کے نور سے |
| نازل ملائکہ ہوں دلِ پاک صاف میں |
| اس ماہ میں ہی ڈھونڈنے کو لیل قدر کی |
| کچھ خوش نصیب بیٹھتے ہیں اعتکاف میں |
| طارق خدا کا قُرب ہے گر مقصدِ حیات |
| بہتر ہے پھر رہیں اسی گھر کے طواف میں |
معلومات