| میکدے میں کبھی ساقی نے اگر چھوڑ دیا |
| ہم نے کب نشّے میں محبوب کا در چھوڑ دیا |
| ذکرِ دُشنام دہی سُن کے جو رونا آیا |
| اشک پلکوں میں پرونے کا ہنر چھوڑ دیا |
| راحتِ وصل کی عادت نہیں ڈالی خود کو |
| قیس نے ہجر میں تنہائی کا ڈر چھوڑ دیا |
| اب تو جنگل میں بھی سنّاٹا نہیں ہوتا کبھی |
| شہر والوں نے کہاں شور ادھر چھوڑ دیا |
| شکوہ ان سے نہیں بارات میں وہ آ نہ سکے |
| اب جنازے میں بھی لوگوں نے گزر چھوڑ دیا |
| ہم تو منزل پہ پہنچ کر بھی مسافر ہی رہے |
| اُس نے جب آتے ہمیں دیکھا تو گھر چھوڑ دیا |
| دیدۂ تر میں کہیں ڈوبنے والوں نے کہا |
| ہم اُتر آئے جو دریا میں بھنور چھوڑ دیا |
| رات بھر شمع نے محفل میں اُجالا کر کے |
| کیا ہوا تم کو اگر وقتِ سحر چھوڑ دیا |
| طارق انجامِ محبّت سے غرَض کیا ہم کو |
| ہو گا افسوس اگر ہم نے سفر چھوڑ دیا |
معلومات