| ہمیشہ ہر گھڑی ہر لمحہ فکرِ آرزو رہنا |
| بہت مشکل ہے دے کے دل کسی کو سرخرو رہنا |
| عجب لذت ہے اے دل ! وصل سے بیزار رہنے میں |
| فراقِ یار میں ہردم سراپا جستجو رہنا |
| کبھی تو رنگ لاۓ گا تجھے پانے کی چاہت میں |
| مرا یوں دربدر پھرنا مرا یوں کوبکو رہنا |
| کلیم اللہ نہیں گرچہ مری بھی یہ تمنا ہے |
| حضورِ یزد میں دو پل ہی محوِ گفتگو رہنا |
| "رَأی ربّهْ" کا نعرہ ہو تمنا ہو مری پوری |
| یہی دیرینہ خواہش ہے خدا سے روبرو رہنا |
| اگرچہ "لن ترانی" ہے ترا دعویٰ خدائے طور |
| مگر اک ٹوٹے دل کی یاس ہے کچھ دوبدو رہنا |
| کہا میں نے جو بر آۓ تمنا میری اے مولی ! |
| صدا آئی فلک سے یہ ہمیشہ باوضو رہنا |
| یہ "اوصیکم بتقوی اللهِ" ہی سرمایَۂ کل ہے |
| یہی اصلِ تصوف ہے اسی سے خوبرو رہنا |
| اے غافل ! عطر بیزی مشک و عنبر سے نہیں ہوتی |
| کلام اللہ کو لازم پکڑ پھر مشکبو رہنا |
| ظفر یابی کا نکتہ ہے اسی نسخے میں پوشیدہ |
| یہی مقصودِ ہستی ہے ہمیشہ عبدِ ھو رہنا |
| محبت رنگ لاتی ہے اگر اہلِ وفا کی ہو |
| وگرنہ جابجا بے جا ہے بے جا جوبجو رہنا |
| ہے رسمِ عاشقی معشوق کی راہوں میں لٹ جانا |
| کسی عاشق سے سیکھو مجنووں سا چار سو رہنا |
| سبق لے قیس کی صحرا نوردی سے تو یہ شاہؔی |
| کہ اہلِ دل کا شیوہ ہے سراپا جستجو رہنا |
معلومات