| اظہارِ حسن باعثِ تخلیقِ کائنات |
| قلب و نظر ہیں محوِ ظہورِ تجلّیات |
| ہوش و خرد فقط تو کریں وصل کو محال |
| عشق و جنوں سے طے ہوں یہ سارے معاملات |
| پائے زمین و آسماں میں ایسے اتفاق |
| چشمِ فلک نے دیکھ لئے کتنے معجزات |
| جب تک نہ ہو تعلّقِ خاطر بنا ہوا |
| ہم لاکھ چاہیں کوئی بھی بنتی نہیں ہے بات |
| وہ مان جائے ہم جو رضا اس کی جان لیں |
| راضی وہ ہو گا جب بہ رضا ہوں گی مرضیات |
| سیلاب زلزلے کبھی کوئی وبا پڑے |
| ہوتے ہیں اس طرح کے تو دنیا میں سانحات |
| جب تک نہ اک کڑی سے ملے دوسری کڑی |
| ممکن کہاں ہے رونما ہوں ایسے واقعات |
| ہم اس کے راستے میں کھڑے اس طرح رہیں |
| شاید کبھی کہیں پڑے گی نظرِ التفات |
| لوگوں کی اس طرف کو توجّہ نہیں مگر |
| ہں بے وجہ یہ آفتیں بے انت حادثات |
| اب پھر سے ایک مردِ خدا نے کہا یہی |
| بدلو گے اپنے آپ کو تب پاؤ گے نجات |
| پہچان جاؤ مقصدِ تخلیق تم اگر |
| ایمان لا کے اس پہ عمل پر کرو ثبات |
| طارق نظامِ نو کی ضرورت ہے جلد اب |
| پیغام دو سبھی کو بچائے گا یہ حیات |
معلومات