| جو چھپا رکھا تھا چہرہ کُھل گیا |
| حسن کا ہم سے جو پردہ کُھل گیا |
| آنکھ سے ٹپکا ہے خونِ دل مگر |
| کوچۂ جاناں کا رستہ کُھل گیا |
| زلف اس نے کھول دی جب شام کو |
| رات کی آمد کا عُقدہ کُھل گیا |
| اس نے پوچھے تھے چنیدہ کچھ سوال |
| رفتہ رفتہ سارا پرچہ کُھل گیا |
| تھی خزانے کی ہمیں کب سے تلاش |
| وہ ملا تو سارا نقشہ کُھل گیا |
| چند لمحے اس کی صحبت میں رہے |
| آنکھ بھیگی ، دل کا دجلہ کُھل گیا |
| داستاں اس نے سنائی رات بھر |
| صبحدم اک اور قصّہ کُھل گیا |
| عمر بھر رکھی چھپا کر ساری بات |
| پیار سے پوچھا تو بندہ کُھل گیا |
| عشق سے پائی ہے طارق نے حیات |
| عقل کی جانب ، دریچہ کُھل گیا |
معلومات