| ہے بصارت تو کہیں چشمِ بصیرت ہی نہیں |
| اشک بہتے ہیں مگر دل میں وہ رقّت ہی نہیں |
| سارے سامانِ مدارات میسّر ہوں ہمیں |
| تُو نہ ہو ساتھ تو ایسی کوئی چاہت ہی نہیں |
| آئنہ صاف ہو دل کا ، تو نظر آتا ہے |
| وہ تِرا چہرہ کہ ویسی کوئی صورت ہی نہیں |
| ہم سفر کوئی تو ایسا ہو کہ رہ دکھلائے |
| اب بھٹک جانے کی باقی کوئی ہمّت ہی نہیں |
| اب تو پھولوں سے گزارا نہیں ہوتا اپنا |
| اب جو کانٹوں کے بنا رہنے کی عادت ہی نہیں |
| مستقل ایک تماشا ہے شب و روز بنا |
| ان مناظر کے بدل جانے کی صورت ہی نہیں |
| آسماں سے ہی کوئی آئے تو کچھ بات بنے |
| اب زمیں میں تو رہی باقی فراست ہی نہیں |
| تم دکھاتے ہو انہیں شمس و قمر کیا طارق |
| آنکھ کے اندھے کہیں ، نور کی حاجت ہی نہیں |
معلومات