خدا نے جب سکھایا ہے کُھلا توبہ کا در رکھنا |
تو کر کے درگزر ، سب دوستوں کو معتبر رکھنا |
ضروری تو نہیں جو تم سمجھتے ہو، وہی سچ ہو |
کہیں کوئی غلط فہمی نہ ہو یہ سوچ کر رکھنا |
جلا دینا دِیا ، دیکھو اندھیرا جب کسی گھر میں |
اُسے جلتے ہوئے جب تک نہ ہو جائے سَحَر رکھنا |
سرِ رہ مِلنے والے اجنبی لوگوں سے ملنا جب |
نہ کہنا دل کی باتیں ، گفتگو بس مختصر رکھنا |
چھپانا تو ہوا کرتا ہے مشکل حالِ دل اکثر |
نہ چہرے سے عیاں حالت ہو یوں صورت مگر رکھنا |
مخالف ہر قدم پر راستہ روکیں گے لیکن تم |
مقابل ہو کوئی ، ہر حال میں سینہ سپر رکھنا |
جسے سمجھو تمہاری دوستی کی پاسداری ہے |
تو اس سے واسطہ بے شک ، بلا خوف و خطر رکھنا |
بلندی مرتبے میں اپنے چاہو جو کبھی طارق |
مرا اعلٰی ہے رب کہتے ہوئے سجدے میں سر رکھنا |
معلومات