| عمر بھر جس نے کبھی دھوکا دیا ہوتا نہیں |
| کیا عجب اس کا خدا اس سے خفا ہوتا نہیں |
| ہم بیاباں میں چلے تو راستہ تھا اجنبی |
| ہم بھٹک جاتے اگر وہ آشنا ہوتا نہیں |
| ہم بھنور میں ڈوب جاتے گر خدائے بحر و بر |
| زندگی کی ناؤ کا خود ناخدا ہوتا نہیں |
| جگ میں آتی ہے نظر جو روشنی پھیلی ہوئی |
| تیرگی تھی ، ایک گر روشن دیا ہوتا نہیں |
| ہم تعاقب میں اسی دنیا کے ہوتے اب تلک |
| خواہشوں کو ہم نے قرباں گر کیا ہوتا نہیں |
| جس بھروسے پر چلے دشمن فنا سب ہو گئے |
| جس سے راضی ہو خدا ، بے آسرا ہوتا نہیں |
| آنکھ کے اندھوں کو حائل ہو گئے سو سو حجاب |
| چشمِ بینا پر عیاں کیونکر خدا ہوتا نہیں |
| رہنمائی خود نہ کرتا بھیج کر گر رہنما |
| اس کے بندوں نے خدا کو پا لیا ہوتا نہیں |
| گود میں بیٹھے ہیں اس کی مثلِ طفلِ شیر خوار |
| اس سے رشتہ ، رحمِ مادر کا بڑا ہوتا نہیں |
| اس کی خاطر جان گر دے دیں امانت اس کی ہے |
| اس کا حق طارق کبھی ہم سے ادا ہوتا نہیں |
معلومات