| عدالت سے رہا ہو کر یہاں خود کو بَری سمجھے |
| حساب اک اور باقی ہے اگر تو آدمی سمجھے |
| صلاحیّت جنم دیتی ہے جذبہ آگے بڑھنے کا |
| ترقی گر نہ ہو پھر علم و دانش کی کمی سمجھے |
| یونہی ہم نے گزاری ، عمر ساری ، اب شعور آیا |
| وصالِ یار کو تخلیق کا مقصد ابھی سمجھے |
| نہ ہمدردی اگر دل میں ہوئی مخلوق کی پیدا |
| فراخی رزق میں ہو تب بھی اس کو مفلسی سمجھے |
| رموزِ بے خودی سے آشنائی ہی نہیں اس کو |
| جو اپنی ضد پہ اَڑ جانے کی عادت کو خودی سمجھے |
| جو دیکھے حضرتِ انساں کو حیرت میں وہ پڑ جائے |
| جسے شیطان ، بہکانے میں اپنی برتری سمجھے |
| مری باتیں سمجھ پائیں اگر وہ غور سے سن لیں |
| مگر باتوں کو میری وہ ہمیشہ سر سری سمجھے |
| ہمیں گو فلسفی ہونے کا دعویٰ تو نہیں طارق |
| سمجھنا چاہتا ہے جو وہی سمجھے ، یہی سمجھے |
معلومات