| دل محبّت میں کسی کی چُور رکھ |
| اور دل میں معرفت کا نُور رکھ |
| غیر کو بھی عشق کا تُو جام دے |
| خود کو بھی تُو ہر گھڑی مخمُور رکھ |
| ہو اگر انعام یا ہو ابتلا |
| جو بھی ہو اُس سے عطا منظور رکھ |
| لن ترانی سُن کے رہ اوقات میں |
| سامنے نظروں کے کوہِ طور رکھ |
| عاجزی لے لے تکبُّر کی جگہ |
| کامیابی میں یہی دستُور رکھ |
| چاہتا ہے تُو جو کوشش کا ثمر |
| اجر پورا دے اگر مزدور رکھ |
| دیکھنے کو منتظر ہے کائنات |
| یوں نہ اپنا حسن تُو مستور رکھ |
| کون ہے طارق تِرا تیرے سوا |
| خود کو اپنے آپ سے مت دور رکھ |
معلومات