اب جو پھیلی ہے یہ وبا کیا ہے |
ساری خلقت کو اب ہوا کیا ہے |
یرغمال اس نے کر لیا سب کو |
اس سے آگے کی اب سزا کیا ہے |
دور رہنے میں اب بھلائی ہے |
یہ بھلا ہے تو پھر برا کیا ہے |
کب سے گھر میں غریب بیٹھے ہیں |
ان کے پاس اور اب بچا کیا ہے |
جن کے پیارے بچھڑ گئے ان سے |
ان کو تیرا اب آسرا کیا ہے |
ابنِ آدم کی یہ خطا ہے اگر |
در پہ تیرے یہ قفل سا کیا ہے |
جن کے گھر میں کوئی چراغ نہیں |
ان کو اندیشہِ ہوا کیا ہے |
یہ اگر ابتدا ہے تو اس کی |
تم بتاؤ کہ انتہا کیا ہے |
کل جو ہو گا وہ جاں گزا ہو گا |
آج جو ہو رہا برا کیا ہے |
معلومات