| چاک سے دور ، رفو گر تو نہیں جا سکتا |
| دور مجھ سے مرا دلبر تو نہیں جا سکتا |
| اے خدا میری خطائیں مری تقدیر میں تھیں |
| میں ترے حکم سے باہَر تو نہیں جا سکتا |
| ہاتھ اٹھائے ہیں ترے در پہ جو آ کے تو بتا |
| ہاتھ خالی لئے مضطر تو نہیں جا سکتا |
| چاہتا ہوں تجھے مانگوں تو تجھے مانگنے کو |
| میں کسی اور کے در پر تو نہیں جا سکتا |
| وہ جو کہتا ہے مجھے ، کہتا جو ہوں دل میں نہیں |
| چیر کے دل کوئی اندر تو نہیں جا سکتا |
| علم کے تُو نے خزانے جو کئے ہیں تقسیم |
| چھوڑ کر کوئی یہ گوہر تو نہیں جا سکتا |
| ناؤ ڈوبے گی تو اترے گی اسی کے من میں |
| ناؤ سے دور سمندر تو نہیں جا سکتا |
| جب بھی دیکھا ہے اسے آتے مدد کو طارق |
| دور آنکھوں سے وہ منظر تو نہیں جا سکتا |
معلومات