| تیرہ و تاریک راہیں ہیں نگاہیں خیرہ کن |
| وعدۂ فردا پہ زندہ ہیں عزیزانِ وطن |
| ساکنانِ حسرت و درماندگی واللّہ نہ پوچھ |
| آنسوؤں سے پیاس بُجھتی ہے غذا رنج و محن |
| اشتہائے بھُوک سے مغلوب ہو جب نازنیں |
| میری نظروں میں اسی کا نام ہے دَورِ فتن |
| قُمریاں خاموش ہیں سہمے ہوئے ہیں بال و پر |
| اس زمانے کے لئے موزوں نہیں سر و سمن |
| کب تلک شہرِ خموشاں میں سیاسی بازی گر |
| مقتلوں کو نام دیتے جائیں گے گنگا جمن |
| نا کہیں دارو نہ روٹی نا کہیں رہنے کو گھر |
| ننگے پاؤں گھومنا پھرنا فلک سایہ فگن |
| یا تو ارضِ پاک پر سایہ کسی وحشت کا ہے |
| یا عزیزانِ چمن کے رُوپ میں ہیں گور کن |
| ورطۂ حیرت میں ہوں سارے اکابر کیا ہوئے |
| اُڑ رہے ہیں چرخِ نیلی فام پر زاغ و زغن |
| ہم نے یہ مانا کہ تم مخلص ہو پاکستان کے |
| عقل سے پیدل ہو جاؤ بھاڑ میں ننگِ وطن |
معلومات